Her er fredagsgaukane

André Ulveseter på Sjøborg.

André Ulveseter sikra seg diplomet for «Årets Skjemtegauk» på Sjøborg i fjor. I år står han på scena når festivalen opnar fredag 12. august.

André, Christer, Vidar og Magne. Fredag kveld blir ei festframsyning på Skjemtegauk 2016.

Skjemtegauk 2016 blir arrangert på Sjøborg kulturhus fredag 12. og laurdag 13. august. Framsyningane startar klokka 21.00. Billettar finn du på Sjøborg sine nettsider. Meir informasjon om årets festival finn du her.


Christer Torjussen

Christer Torjussen

I startoppstillinga denne fredagskvelden finn de tre komikarar som har vunne publikumsprisen tidlegare. Fyrstemann gjorde det allereie i andre årgang av Skjemtegaukfestivalen.

Christer Torjussen er ein av veteranane på Skjemtegaukfestivalen, men også i det norske standupmiljøet. I 2004 vann han Stå Opp-prisen, og i 2007 fekk han Komiprisen for «Beste Standup».

Christer har vore med på Skjemtegauk fem gonger tidlegare, sist i 2014. Det besøket resulterte mellom anna i dette innlegget om festivalopplevingane.

Og forresten:

Har du ikkje fått med deg nettsida til Christer? Sjekk den ut. Her finn du mange gode anbefalingar om du er glad i å reise.


André Ulveseter, bergenskomikar med vonde minner frå Høddvoll.

André Ulveseter

Fjorårsvinnar André Ulveseter er også med når festivalen brakar laust midt i august. Bergensaren med tilhald i Ålesund kjem over Breisundet for å freiste å sikre sitt andre diplom.

André er ein driven komikar, og var for fyrste gong med oss i 2007. I år er han med på sin femte festival i Ulsteinvik.

Mange kjenner han nok gjennom Facebook-fenomenet «Bilder i kampen mot særskrivingsfeil», som også har enda i to bøker og turné rundt om i landet.

I fjor sette han opp sitt fyrste soloshow «Plenum». I sommar har han og makker Henrik Overaa Bjørnson flytta podkasten «Distingvertene» over på Sunnmørsposten si plattform.

12. august står han på scena hjå oss.


 

ÅRETS SKJEMTEGAUK 2009: Vidar Hodnekvam

Vidar Hodnekvam

I 2010 fekk me vår fyrste dobbeltvinnar, då Vidar Hodnekvam vann sin andre publikumspris på rad. Strilen har siste året stått bak showet «Bergensbølgen» saman med to andre tidlegare Skjemtegauk-komikarar, og vart nominert til Komiprisen i år for sitt bidrag.

«Bergensbølgen er her – gå mann av huse» skreiv Bergensavisen då premieren var eit faktum. Det håper me sjølvsagt også at sunnmørspublikummet gjer, når ein tredel av bølgen skyller over Sjøborg.

Vidar har erfaring både frå scene og fjernsyn, og blir alltid godt motteken når han er i Ulsteinvik. Når han dukkar opp 12. august er det femte gongen han står på scena på Skjemtegaukfestivalen.


Magne Storvik

Magne Storvik

Magne Storvik kjem frå Ålesund for å vere med på sin andre Skjemtegaukfestival. Sist han var med vart det både blod, svette og i alle fall nesten tårer, etter eit (u)blidt møte med ein mikrofon.

Magne var med på å starte Standup Trondheim allereie i 1998, og har stått på scener i heile landet etter den tid. Då han stod på scena hjå Standup Ålesund i januar vart det omtala som «ein gong i skotåret» at han står framfor publikum. Dette skotåret blir det i alle fall to gonger.

Me gler oss til å få Magne tilbake på scena i Ulsteinvik 12. august.


Du kan finne meir informasjon om Skjemtegaukfestivalen ved å følgje oss på Facebook. Del gjerne sida vår, så får også dine kjenningar med seg kva som skjer.

You may also like...

1 Response

  1. 29. juni 2016

    […] Her kan du lese om lagoppstillinga fredag kveld. […]